Vladimir viloyati

Vikipediya, ochiq ensiklopediya

Vladimir viloyatiRossiya Federatsiyasi tarkibidagi viloyat. 1944-yil 14 avgustda tuzilgan. Maydon 29,0 ming km2. Aholisi 1660 ming kishi (1995), 80% shaharlik. Viloyat tarkibida 21 shahar, 36 shaharcha bor. Markazi – Vladimir shahri. Vladimir viloyati Sharqiy Yevropa tekisligida joylashgan. Yer usti bir oz past-baland tekislik (eng baland joyi 236 m). Iklimi moʻʼtadil kontinental. Yanvarning oʻrtacha yoki haroratsi – 1G, iyulniki 17°. Yiliga 480–580 mm yogʻin yogʻadi. Vegetatsiya davri 160–180 kun. Asosiy daryolari: Oka va Klyazma. Tuproqlari asosan, turli xil mexanik tarkibdagi chimli podzol tuproqlar. Meshchera pasttekisligida botqoq tuproqlar, Oka va Klyazma vodiylarida chimli allyuvial tuproqlar.

Energetikasi chetdan keltirilgan yoqilgʻi asosida ishlaydi, torf qazib chiqariladi. Issiqlik elektr stansiyasi bor. Asosiy sanoat tarmoqlari – mashinasozlik va metallsozlik. Traktor, elektr motorlari, avtopribor (Vladimir), ekskavator, mototsikl (Kovrov), teplovoz, muzlatgich (Murom), radioapparatura va televizorlar (Aleksandrov), kabel (Kolchugino) va b. ishlab chiqariladi. Yengil sanoat (asosan zigʻir tolasidan gazlama ishlab chiqarish va trikotaj buyumlar) korxonalari ham bor. Oyna-shisha, jumladan texnik oyna, billur idishlar (GusXrustalniy va boshqalar) ishlab chikariladi. Yogochsozlik sanoati rivojlangan. Badiiy buyumlar sanoati – kashtachilik, zargarlik korxonalari, miniatyuralari (Mstyora) bilan ham mashhur.

Qishloq xoʻjaligida asosan kartoshka, zigʻir ekiladi. Shaharlar atrofida – sabzavotchilik, Opoleda bogʻdorchilik rivojlangan. Chorvachiligi sut-goʻsht yetishtirishga ixtisoslashgan. Qoramol, choʻchqa, qoʻy va echki boqiladi. Temir yoʻl zich joylashgan. Avtomobil yoʻllari rivojlangan. Oka va Klyazma daryolarida kema qatnaydi. 1992-yilda 11 oʻrta maxsus oʻquv yurti, 2 oliy oʻquv yurti, 2 teatr, muzey faoliyat koʻrsatadi.

Adabiyotlar[tahrir | manbasini tahrirlash]

  • OʻzME. Birinchi jild. Toshkent, 2000-yil