Toshkent axborot texnologiyalari universiteti
| Muhammad Al-Xorazmiy nomidagi Toshkent axborot texnologiyalari universiteti (TATU, TUIT) | |
|---|---|
 | |
| Asl nomi | Toshkent axborot texnologiyalar universiteti |
| Xalqaro nomi | Tashkent University of Information Technologies |
| Asos solingan | 1955-yil |
| Oʻquv yurti turi | Universitet |
| Rektori | Toʻlqin Teshabayev [1] |
| Talabalari | 11,000+ |
| Bakalavriat | 25 ta yoʻnalish |
| Magistratura | 24 ta mutaxassislik |
| Akademiklar | 1 ta |
| Fan doktorlari | 16 ta |
| Professorlar | 16 ta |
| Manzili | Amir Temur koʻchasi 108, Toshkent shahri, 100020, Oʻzbekiston |
| Vebsayti | www.tuit.uz |
Toshkent axborot texnologiyalari universiteti (qisqartmasi TATU; 2002-yilgacha Toshkent elektrotexnika aloqa instituti) — Toshkentdagi oliy oʻquv yurti boʻlib, informatika va axborot texnologiyasi, pochta xizmati, radioeshittirish va televideniya, telekommunikatsiyalar boʻyicha yuqori malakali mutaxassislar tayyorlaydi. Toshkent elektrotexnika aloqa instituti nomi bilan 1955-yilda tashkil qilingan. 2003-yildan hozirgi nomi bilan ataladi. Universitetda va filiallarida 11000 dan ortiq talabalar taʼlim oladilar.
Mundarija
Universitet haqida[tahrir]
Universitet tashkil qilingandan beri 30 mingdan ortiq yuqori malakali mutaxassis tayyorlandi. Universitetda 9 yoʻnalish boʻyicha bakalavrlar va 5 mutaxassislik boʻyicha magistrlar tayyorlanadi.
Fakultetlar[tahrir]
Hozirgi kunda universitet tarkibida jami 8 ta fakultet bor. Ular :
- Kompyuter injiniringi fakulteti
- Dasturiy injiniring fakulteti
- Televizion texnologiyalar fakulteti
- Telekommunikatsiya texnologiyalari fakulteti
- AKT sohasida Iqtisodiyot va menejment fakulteti
- AKT sohasida Kasb-taʼlimi fakulteti
- Axborot xavfsizligi fakulteti
- Radio va mobil aloqa fakulteti
Bulardan tashqari universitetda maxsus harbiy fakultet ham mavjud.
Professor-oʻqituvchilar tarkibi[tahrir]
Professor-oʻqituvchilar tarkibi 400 ga yaqin boʻlib, ular: 1 akademik, 16 professor, 16 fan doktorlari, 85 nafar fan nomzodlari va dotsentlardan iborat.
Universitet tuzilishi[tahrir]
Universitetda 28 kafedra va 37 oʻquv laboratoriyalari, 10 tadqiqotchilik laboratoriyalari va shaxsiy tarmogʻi bilan kompyuter markazlari, zamonaviy (1800 dan ortiq) komputerlar hamda multimediali sinflar (20 dan ortiq), 400 mingdan ortiq kitoblar bilan axborot-resurs markazi (kutubxona) mavjud.
Universitet qoshida ilmiy tadqiqotlar sektori, litsey-instituternat, akademik litsey va kasb-hunar kolleji mavjud.
Universitet Germaniya, Angliya, Belgiya, Xitoy, Hindiston, Koreya, Rossiya, Ukraina kabi davlatlar bilan ilmiy hamkorlik qiladi.
Universitet faoliyati J. A. Abdumayev, T. D. Rajabov, M. S. Yunusov, T. S. Yoʻldoshboyev, F. B. Abutaliyev, S. S. Kolesov, M. N. Oripov, V. M. Son, Yu. S. Saʼdullayev, V. V. Yakovlev, X. K. Oripov, S.S. Qosimov va boshqa olimlar nomi bilan bogʻliq.
Tarixi[tahrir]
TATU 1955-yilda tashkil etilgan. 2002-yilgacha Toshkent Elektrotexnika Aloqa Instituti deb nomlangan. 2002-yili 1-iyunda Oʻzbekiston Respublikasi Prezidenti Islom Karimov qaroriga koʻra u universitetga aylantirildi.
- 1955 yil — Toshkent elektrotexnika aloqa instituti (TEAI)
- 1960 yil — Elektroaloqa muhandislari birinchi avlodi tayyorlandi
- 1978 yil — Bishkek, Dushanbe, Almati va Fargʻona shaharlarida TEAI sirtqi fakultetining tayanch punktlari tashkil etildi
- 1993 yil — TEAI instituti qoshida aloqa zobitlarini tayyorlash uchun maxsus fakultet tashkil etildi
- 1994 yil — Markaziy Osiyo respublikalari hamda Moʻgʻuliston, Pokiston va Hindiston aloqa tarmoqlari injener-texnik xodimlari malakasini oshirish uchun institut qoshida Markaziy Osiyo telekommunikatsiya oʻquv markazi (SAUTST) tashkil etildi
- 1997 yil — institut qoshida litsey-instituternat faoliyat yurita boshladi
- 1999 yil — institut qoshida akademik litsey faoliyat yurita boshladi.
- 2003 yil — Oʻzbekiston Respublikasi Prezidenti Farmoniga asosan TEAI Toshkent axborot texnologiyalari universiteti (TATU) deb atala boshlandi
- 2005 yil — Qarshi, Nukus, Samarqand, Urganch va Fargʻona shaharlarida TATU mintaqaviy filiallari tashkil etildi
- 2017 yil — Universitetga Muhammad Al-Xorazmiy nomi berildi [2]
TATU bugun[tahrir]
Bugungi kunda TATU — bu zamonaviy tipdagi, yuqori ilmiy-pedagogik salohiyat, taʼlim kommunikatsiyalarining keng turlari, xalqaro aloqalarning rivojlangan tarmog‘i, jamiyatda mutaxassislar tayyorlash darajasi bo‘yicha yuqori mavqega ega bo‘lgan universitetdir. Universitet telekommunikatsiya va axborot tizimlari sohasida Markaziy Osiyoda yetakchi oʻquv muassasasi hisoblanadi. Oʻzbekiston Respublikasi Prezidentining 2005-yil 2-iyunda qabul qilingan „Axborot texnologiyalari sohasida kadrlar tayyorlash tizimini takomillashtirish toʻgʻrisida“gi Qaroriga binoan TATU axborot-kommunikatsiya texnologiyalari sohasida kadrlar tayyorlash boʻyicha tayanch oliy oʻquv muassasasi hisoblanadi. Taʼlim bosqichlari: oʻrta taʼlim (2 ta litsey), bakalavriat (25 ta yoʻnalish), magistratura (24 mutaxassislik), aspirantura va doktoranturadan iborat.
Soʻnggi 10 yil davomida universitet tubdan oʻzgardi. Universitet binosi, auditoriyalar va kabinetlar, talabalar uyi binosi kapital taʼmirlandi, yangi zamonaviy oʻquv binosi, 700 oʻrinli oshxona, 400 oʻrinli sport majmuasi qurildi. Shu bilan birga, Oʻzbekiston Aloqa va axborotlashtirish agentligi va axborot-kommunikatsiya texnologiyalari sohasida Oʻzbekiston bozorlarida ishlovchi qator kompaniyalar hamda korxonalar tomonidan katta homiylik yordami koʻrsatildi.
Adabiyotlar[tahrir]
- Teshaboyev, T., (2014). TATU — salohiyatli mutaxasislar tayyorlash maskani. infoCOM.uz. № 3, 147, 14-16.
Manbalar[tahrir]
Havolalar[tahrir]
 | Ushbu maqolada Oʻzbekiston milliy ensiklopediyasi (2000-2005) maʼlumotlaridan foydalanilgan. |
 |
