Ibrohim Rahim

Rahimov Ibrohim Abdurahimovich
Tugʻilishi	15-oktabr 1916-yil(1916-10-15) Fargʻona
Vafoti	22-noyabr 2001-yil(2001-11-22) (85 yoshda) Toshkent
Mukofotlari

Ibrohim Rahim (taxallusi, toʻliq ism-sharifi Rahimov Ibrohim Abdurahimovich) (1916.15.10, Fargʻona viloyati Quva tumani — 2001.22.11, Toshkent) — Oʻzbekiston xalq yozuvchisi (1976), Oʻzbekistonda xizmat koʻrsatgan sanʼat arbobi (1966). Ikkinchi jahon urushi qatnashchisi. Respublika radiosida siyosiy eshittirishlar boʻlimi bosh muharriri (1946—1947), „Qizil Oʻzbekiston“ gazetada boʻlim mudiri (1950), muharrir (1950—1961), Oʻzbekiston Jurnalistlar uyushmasi boshqaruvi raisi (1957—1963). „Oʻzbekfilm“ kinostudiyasi direktori (1962-1966), Oʻzbekiston Davlat Kinematofafiya qoʻmitasi raisining birinchi oʻrinbosari (1963-1964). „Guliston“ (1966—1969), „Mushtum“ (1971 — 1984) jurnallarida bosh muharrir.

Ilk dostoni — „Bahodir“ (1939) chegarachilar hayotidan yozilgan. „Sen tugʻilgan kun“ (1967), „Mangulik qoʻshigʻi“ (1970) qissalarida, „Fidoyilar“ (1972), „General Ravshanov“ (1985) romanlarida Ikkinchi jahon urushi qahramonlarining hayotini, oʻzbek xalqining urush yillaridagi mehnat jasoratini aks ettirgan. „Ixlos“ (1958), „Taqdir“ (1964), „Tinimsiz shahar“ (1968), „Oqibat“ (1992) kabi romanlari yangi yerlarni oʻzlashtirish, yoshlar oʻrtasidagi doʻstlik va muhabbat, Toshkent zilzilasida oʻzbek xalqining sabrmatonati hamda qahramonliklariga bagʻishlagan.

Ibrohim Rahimning mustaqillik yillarida yozgan qissa, hikoya va ocherklari „Qurboningman“ (1996), „Hayotni asrang, odamlar“ (1997) kitoblariga jamlangan. „Jonim fido“ va „Chaqmoq“ dramalari (1974), „Zangori olov kishilari“ (1961), „Qalbingda quyosh“ (1963), „Farhodning jasorati“ (1969), „Ahmad Fargʻoniy“ (2000) kinossenariylari muallifi. Hamza nomidagi Oʻzbekiston Davlat mukofoti laureati (1983). „Doʻstlik“ (1996), „El-yurt hurmati“ (1998) ordenlari bilan mukofotlangan.