Gʻulomjon Hojiqulov

Vikipediya, ochiq ensiklopediya
Jump to navigation Jump to search

Hojiqulov Gʻulomjon (1928.6.2, Buloqboshi) — sozanda (gʻijjak), xonanda, bastakor. Oʻzbekiston xalq artisti (1988). Andijon gʻijjakchilik maktabining yirik vakili. Ilk musiqa saboqlarini togʻasi Ergash Abdurahmonovdan, milliy mumtoz musiqa namunalari va sozandalik sanʼatini Y.Rajabiy, K.Jabborov, S.Kalonov lardan oʻrgangan. Yangiyo'l teatrida sozanda (1942-45), Andijonda cholgʻu ansambli (1946-49), Andijon teatri (1949-90) da sozanda va musiqa rahbari, bosh dirijyor (1990-2003). 1995-yildan oʻgʻli Ravshanbek H. bilan „Meros“ maqom ansambli rahbari. 1998-yildan Andijon unversitetida pedagog, faxriy professor (2001).

Cholgʻu kuylar, ashulalar („Jafo qilma“, Sakkokiy gʻazali; „Xirom etgil“, Dilafkor; „Lola sayli“, E.Vohidov; „Nozima“, „Gul uzatsam“, P.Mo'min; „Koʻz qorayguncha“, Hofiz va boshqalar), spektakllar (M.Boboyevning „Vatan madhi“, A.Qodiriyning „Mehrobdan chayon“ va boshqalar)ga musiqa bastalagan. Nozik taʼb sozanda H. repertuaridan „Miskin“, „Ajam“, „Nasruloyi 1-4“, „Nasri Segoh 1-3“, „Sarparda“, „Pok“, „Qurbon qaytarma“ kabi cholgʻu kuy (turkum)lar oʻrin olgan. H. oʻziga xos, jozibali ovozida „Ushshoq“, „Girya 1-2“, „Azim daryo“, „Bayot“, „Dugoh“ kabi mumtoz ashula va maqom yoʻnalishlarini taqdim etgan. H. A.Ismoilov, H.Oxunova, K.Rahimov, N.Hamroqulov, A.Dadayev, Oʻ.Nuraliyevlarga ustozlik qilgan. Ijrolari Oʻzbekiston radiosi fonotekasiga yozilgan. „El-yurt hurmati“ ordeni bilan mukofotlangan (1999).