Ostonaqul qoʻshbegi

Vikipediya, ochiq ensiklopediya
Jump to navigation Jump to search

Ostonaqul qoʻshbegi, Ostonaqulbiy Muhammad Sharif Devonbegi oʻgʻli (1860—1923) — mangʻitlar davrida saroy arbobi, bosh zakotchi, qoʻshbegi. Qarshi va Chorjoʻy viloyatlari hokimi (1879—86). U Buxoro amirligida qoʻshbegi — bosh vazir (1886 — 1910) boʻlgach, amir Abdulahad barcha davlat ishlarini unga topshirib, oʻzi Karmanada oʻtirgan. Ostonaqul qoʻshbegi amir nomidan faoliyat yuritib, Rossiya imperiya-sining Buxorodagi siyosiy agenti bilan muomala qilgan. Bir necha marta Rossiyaga borgan.

Ostonaqul qoʻshbegi, amir Muzaffar davrida boy berilgan Buxoroning mavqei tiklanishi uchun intilgan. U Buxoroda aroqxoʻrlik va ishratbozlik bazmlarini taqiqlagan, poraxoʻrlikka qarshi kurashgan, raʼiyat farovonligi uchun intilgan. Buxoroda 1910 i. yanvar voqealari, yaʼni shialar va sunniylar oʻrtasidagi xunrezlikdan foydalanib, dushmanlari uni qoʻshbegilikdan olib tashlashga amirni koʻndirishgan. Abdulahad uni Karmanaga chaqirgan, Xatirchi va Ziyovuddin viloyatlariga hokim qilib tay-inlagan (1910). Oradan koʻp oʻtmay u Karmanada zindonga tashlangan. BXSR tuzilgach, "Avkaf" vaqf idorasini boshqargan.

Adabiyot[tahrir]

  • Ayniy S, Buxoro inqilobi tarixi uchun materiallar, M., 1926; Muhammad Ali Baljuvoniy, Tarixi nofeiy (Foydali tarix), T., 2001.[1]

Manbalar[tahrir]

  1. OʻzME. Birinchi jild. Toshkent, 2000-yil