Aqchakoʻl turistik zonasi
| Aqchakoʻl turistik zonasi | |
|---|---|
„Aqchakoʻl“ turistik-rekreatsion hududi | |
| Umumiy maʼlumot | |
| Turi | Turistik hudud |
| Shahar | Ellikqalʼa tumani |
| Mamlakat | Qoraqalpogʻiston |
| Koordinatalar | 41°53′31″N 60°50′49″E / 41.8918154020733°N 60.84696151967012°E G OKoordinatalari: 41°53′31″N 60°50′49″E / 41.8918154020733°N 60.84696151967012°E G O |
| Egasi | Davlat mulkiga tegishli |
 Aqchakoʻl turistik zonasi xaritada | |
Aqchakoʻl turistik zonasi (yoki „Aqchakoʻl“ turistik-rekreatsion hududi) — Qoraqalpogʻiston Respublikasining Ellikqalʼa tumanida joylashgan sohil boʻyi turistik zonasi. Aqchakoʻlda maxsus rekreatsion plyaj zonalarini tashkil etish rejasi 2019-yil sentyabr oyida Oʻzbekiston Respublikasi prezidenti Shavkat Mirziyoyevning Qoraqalpogʻistonga amalga oshirgan tashrifi davomida berilgan topshiriqqa koʻra ishlab chiqilgan.
Faoliyati[tahrir | manbasini tahrirlash]
Aqchakoʻlning umumiy maydoni 1150 ga teng boʻlib, eng chuqur joylari 12 metrgacha yetishi aniqlangan. 2022-yili Aqchakoʻl turistik zonasining infrastrukturasini rivojlantirish maqsadida 10 milliard soʻm mablagʻ ajratilgan. Bu mablagʻ hisobiga sayyohlarga qulaylik yaratilishi uchun kerak boʻladigan maxsus yoʻlaklar, elektr tizimlari, mehmonxonalar, ovqatlanish joylari va katerlar tashkil etilgan. Shuningdek, kattaligi 6000 gektar boʻlgan koʻl hududi 3000 tonnaga yaqin turli chiqindilardan tozalangan[1].
Aqchakoʻl turistik zonasiga 2022-yili 50 000 ga yaqin sayyoh tashrif buyurgan. Shu sababli 50 000 oʻringa moʻljallangan ippodrom qurilishi reja qilingan. 2023-yil holatiga koʻra, sayyohlar uchun 40 kishilik oʻtovlar, 80 oʻrinli hostellar tashkil etilgan boʻlib, 5 yulduzli mehmonxona, 10 ta villa barpo etilishi koʻzda tutilgan. Koʻl yonida maxsus oʻtovlar ham qurilgan[2].
Aqchakoʻl turistik zonasiga mavsumning istalgan vaqtida borib dam olish imkoni mavjud. Qishda baliq ovlash yoʻlga qoʻyilgan boʻlib, koʻlning yarmi 30—40 santimetrgacha muzlashi aytiladi[3].
„Pulli koʻl“ iborasi[tahrir | manbasini tahrirlash]
Aqchakoʻlda choʻmilgan odam boy boʻladi, degan qarash mavjud boʻlib, buning ildizi Chingizxonga borib taqalishi mahalliy aholi tomonidan rivoyat qilib kelinadi. Rivoyatlarga koʻra, Chingizxon bu yerga oʻz oltinlarini choʻktirib yuborganligi sababli bu ibora urf boʻlgan[4].
Manbalar[tahrir | manbasini tahrirlash]
- ↑ "Aqchakoʻl" ekoturizm uchun qulay maskanga aylanmoqda 09.10. 2023
- ↑ „Rost24 - Qoraqalpog`istonda albatta borish kerak bo`lgan besh manzil“ (oz). Rost24. Qaraldi: 2023-yil 27-oktyabr.
- ↑ „O‘zbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi huzuridagi Turizm qo‘mitasi“ (uz). Uzbektourism.uz. Qaraldi: 2023-yil 27-oktyabr.
- ↑ „"Chingizxon oltinlari yashirilgan maskan": Aqchakoʻl turistik zonasi haqida — Toshkent Afishasi“ (uz-Latn). www.afisha.uz (2023-yil 9-oktyabr). Qaraldi: 2023-yil 27-oktyabr.