Abdugʻani Abdullayev
| Abdugʻani Abdullayev | |
|---|---|
 | |
| Tavalludi |
25-iyun 1953-yil |
| Vafoti |
18-dekabr 2017-yil (64 yoshda) Toshkent shahri, Oʻzbekiston |
| Fuqaroligi |
 SSSR  Oʻzbekiston |
| Mukofotlari |
  |
Abdugʻani Abdullayev (1953.25.6, Fargʻona viloyati – 2017.18.12, Toshkent, Oʻzbekiston) – yogʻoch oʻymakori, Oʻzbekiston Respublikasi xalq ustasi (1999). Usta Q. Haydarovning shogirdi. Ustozi bilan birgalikda Toshkentdagi „Fargʻona“ choyxonasi, Xalqlar doʻstligi saroyi, „Zarafshon“ restoranidagi oʻymakori naqshli panjara, darvoza, eshik, namoyonlarni ishlagan. 1983-yildan mustaqil ishlaydi. Ilk bor Olim Xoʻjayev nomidagi teatr (Guliston shahri) binosi uchun 20 dan ortiq oʻymakori eshik, darvoza, panjaralarni tayyorladi. Bir qator jamoat binolari, choyxonalar (Fargʻona, Isfara shahri), „Muborak“ restorani (Toshkent), Qarshi teatri va boshqa binolari uchun nozik islomiy oʻyma naqshlar bilan bezatilgan ustun, eshik, darvoza, panjaralar yaratdi; Imom al-Buxoriy majmuasida yogʻoch oʻymakorligi ishlariga rahbarlik qilib, shogirdlari bilan birga sharafalar, hovuzaklar tayyorladi, ayvonlar shiftini vassa-juft yopish, oʻymakori ustunlari yaratishda yuksak mahorati namoyon boʻldi (1998), Shuningdek Bahouddin Naqshband maqbarasida (Buxoro viloyati) restavratsiyasiya, yogʻoch oʻymakorligi ishlarini bajarilgan, Qatagʻon qurbonlari xotirasi muzeyi (Toshkent), Xotira xiyoboni, Burxoniddin Margʻinoniy (Fargʻona viloyati) majmuasi qurilishida ishtirok etgan. Toshkentdagi „Xotira maydoni“ (1999)dagi ayvonlarning oʻyma naqshli ustunlarini milliy meʼmorlik anʼanalari asosida yuksak mahorat bilan bezagan. 1973-yildan xalqaro koʻrgazmalarda badiiy asarlari bilan qatnashadi[1].
Abdugʻani Abdullayev yoʻqolib borayotgan naqshlarning noyob turlarini tiklash bilan shugʻullangan, yangi uslublarni amaliyotga joriy qilgan. 1999-yilda Abdugʻani Abdullaevga Oʻzbekiston Respublikasi xalq ustasi unvoni berilgan (1999). 2006-yil 25 avgustda „Oʻzbekiston Qahramoni“ unvoni berilgan[2].
Abdugʻani Abdullayev 2017-yil 18-dekabrda Toshkent shahrida vafot etgan[3].
Manbalar
[tahrir | manbasini tahrirlash]- ↑ OʻzME. Birinchi jild. Toshkent, 2000-yil
- ↑ „O‘zbekiston Qahramoni Abdug‘ani Abdullayev shu yil 18-dekabr kuni vafot etdi“ (uz) (uza.uz). 2024-yil 14-sentyabrda asl nusxadan arxivlangan. Qaraldi: 2024-yil 14-sentyabr.
- ↑ „O‘zbekiston Qahramoni, hunarmand Abdug‘ani Abdullayev vafot etdi“ (uz) (daryo.uz). 2024-yil 14-sentyabrda asl nusxadan arxivlangan. Qaraldi: 2024-yil 14-sentyabr.
 | Ushbu maqolada Oʻzbekiston milliy ensiklopediyasi (2000-2005) maʼlumotlaridan foydalanilgan. |