Falanga

Vikipediya, ochiq ensiklopediya

Falanga (yun. phalanx) — Yunonistonda ogʻir qurolli piyoda askar (goplit) larning jips safga tizilgan koʻp qatorli jangovar tartibi. F.da askarlar orasidagi masofa 0,5—1 m ni tashkil etgan. F., asosan, 8—16 (baʼzan 25) katordan iborat boʻlib, safda turgan 1000 jangchi 500—1000 m.gacha frontga choʻzilgan. F. Troya urushigacha maʼlum boʻlsada, biroq, u mil. av. 6-a.ga kelib toʻla shakllanadi. Makedoniyalik Filipp IIF. tarkibiga muayyan oʻzgarishlar kiritadi, uni suvoriylar bilan mustahkamlaydi. Makedoniya katta F.si 16384 goplitlar, 8192 peltastlar va 4096 otliq askarlardan tashkil qilingan. F.ning loxos (16 goplitlardan iborat bir qator), sintagma (16 loxoslar) va kichik F. (16 sintagma)dan iborat boʻlinmalari tuzilgan. F. safi (jangovar tartibi) kvadrat, ombir hamda oʻyiq koʻrinishida boʻlgan. F., asosan, uzun nayzalar yordamida roʻparadan qaqshatqich zarba berish uchun moʻljallangan. F.ning janggohda manyovr qilish imkoniyati nisbatan cheklangan. Harakat paytida F.ning safi tez buzilib ketar edi. F. Qad. Rimda (mil. av. 4-a. oxiri) manipula (legion boʻlinmasi) safi joriy qilingunga qadar qoʻllanilgan.