Omina Fayozova

Vikipediya, ochiq ensiklopediya
Jump to navigation Jump to search

Omina Fayozova (1917.5.1, Buxoro 1993.12.11, Toshkent) — Oʻzbekiston xalq artisti (1973). Moskva davlat konservatoriyasi krshidagi Oʻzbek opera studiyasida oʻqigan (1934—35). Toshkent teatr va rassomlik sanʼati institutini tugatgan (1961). Buxoro teatrida (1932—34), Yosh tomoshabinlar teatrida (1935—39), 1939 yildan Muqimiyteatrida ishlagan. "Halima" (Gʻulom Zafariy) spektaklidagi oʻgʻil bola roli uning sahnadagi ilk obrazidir. Keyinchalik "Halima" da Halima, "Arshin mol olon" (U. Hojibekov)da Gulchehra, "Paranji sirlari" (Hamza)da Guljon, "Tohir va Zuhra" (S. Abdulla)da Yulduz, "Ravshan va Zulxumor" (Komil Yashin va T. Jalilov)da Oqqiz, "Momo yer" (Ch. Aytmatov)da Toʻlgʻanoy, "Togʻ goʻzali" (S. Saidmurodov va A. Muhammedov)da Idimoh, "Qaynona" (M. Shamxalov)da Qaynona, "Onasining qizi" (Shuxrat) da Hojar, "Maysaraning ishi" (Hamza)da Oyxon, Maysara, "Farhod va Shirin" (Xurshid)da Yosuman kabi obrazlarni yaratdi. Plastik ifodaviylik, soʻzlarni donadona ishlatish, ayniqsa, oʻtkir hajv va yumor vositalaridan foydalanish, oʻtkir ijtimoiy xarakterlar yaratish F. ijodiga xos xususiyatlardir. "Nurxon" (Komil Yashin va T. Jalilov)dagi Xalcha obrazi aktrisa ijodida alohida oʻrin tutadi. "Qaynona" televizion spektaklidagi Qaynona roli unga katta shuxrat keltirdi. F. filmlar ("Chinor ostidagi duel" va boshqalar)da ham suratga tushgan. "Tabassum" radiojurnali va televizion miniatyuralar teatrining faol ishtirokchisi boʻlgan. "Yer qimirlaganda", "Qaynona bilan kelin", "Erka kampir" kabi kichik kulki xikoyalarning muallifi. U 1947 yildan dublyaj sanʼati bilan shugʻullanib, koʻp kinofilmlarda ovoz bergan.[1]

Manbalar[tahrir]

  1. OʻzME. Birinchi jild. Toshkent, 2000-yil