Hozirgi zamon va Yangi Oʻzbekiston

Muallif(lar)	Shavkat Mirziyoyev
Til	oʻzbekcha
Nashriyot	„Oʻzbekiston“

Hozirgi zamon va Yangi Oʻzbekiston – Oʻzbekiston Respublikasi prezidenti Shavkat Mirziyoyevning 2024-yil chop etilgan kitobi. Kitob „Oʻzbekiston“ nashriyotida nashr etilgan. Kitobning asosiy qismini soʻngi yillarda Oʻzbekistondagi ijtimoiy-iqtisodiy islohotlar, mamlakatning xalqaro miqyosidagi oʻrni, oʻzbek xalqining mehnati va boshqa islohotlarga oid muallifning fikr-mulohazalari tashkil etadi. Kitobning muqovasida Toshkent shahrida joylashgan „Yangi Oʻzbekiston“ bogʻidagi humo qushi monumenti va Oʻzbekiston bayrogʻini uygʻunlashtirilganligini koʻrish mumkin.

Kitobning boblari

Kitob umumiy hisobda 6 bobdan iborat boʻlib, muammolar va ularga yechimlar keltirib oʻtilgan:

1-bob:Insoniyat tanlagan barqaror rivojlanish yoʻli

1-bob „Insoniyat tanlagan barqaror rivojlanish yoʻli“ deb nomlangan. Ushbu bobda muallif dunyodagi oʻzaro kelishmovchiliklar, nizolar va xavf-xatarlarni keltirib chiqargan sabablar va bularga barham berish boʻyicha oʻzining yechimlarini qayd etgan.

2-bob:Yangi Oʻzbekiston – ijtimoiy davlat

Oʻzbekistondagi 2023-yil 30-apreldagi Konstitutsiyaviy oʻzgartishlarda 1-moddasiga davlatning ijtimoiyligi ham kiritilgan edi. 2-bob „Yangi Oʻzbekiston – ijtimoiy davlat“ deya nomlangan. Mazkur bobda mamlakatdagi ijtimoiy sohadagi oʻzgarishlar, jumladan, maktabgacha, maktab va oliy taʼlim, sport, ilm-fan va ijtimoiy himoyaga muhtoj oilalarni qoʻllab-quvvatlash boʻyicha fikrlar bildirilgan. Bundan tashqari, iqtisodiyot sohasida pul-kredit, soliq, moliyaviy operatsiyalar sohasidagi soʻnggi yillardagi yangi tizimlar hamda IT texnologiyalardan keng foydalanish, innovatsion gʻoya va loyihalarni hayotga joriy etish, raqamli texnologiyalardan foydalanishni oshirish taʼkidlangan.

3-bob:Yangi Oʻzbekiston: barqaror iqtisodiy taraqqiyot

3-bob „Yangi Oʻzbekiston: barqaror iqtisodiy taraqqiyot“ deb nomlangan. Mazkur bobda iqtisodiy tarmoqlardagi yutuqlar eʼtirof etilgan. Tadbirkorlikni rivojlantirish, raqamli iqtisodiyot uchun rejalar, oziq-ovqat xavfsizligini taʼminlash, „yashil“ energetika mavzularida fikrlar qayd etilgan.

4-bob:Sayyoramiz va Yangi Oʻzbekiston ekologik tahdidlar qarshisida

4-bob „Sayyoramiz va Yangi Oʻzbekiston ekologik tahdidlar qarshisida“ deb nomlangan. Keyingi yillardagi ekologik inqirozlar iqlim oʻzgarishi, bioxilma-xillikning qisqarishi va atrof-muhit ifloslanishi, tabiiy resurslarning kamayishini tashvish bilan esga olingan. Shu bilan birgalikda, suv muammosiga oliy taʼlimda shu sohada tahsil olgan kadr sifatida muammolar va ularga yechimlar, qoʻshni davlatlar bilan mazkur masaladagi yaqindan hamkorlik boʻyicha fikrlar bildirib oʻtilgan.

5-bob:Xalq xizmatidagi davlat – el-yurt uchun ulugʻ saodat

5-bob „Xalq xizmatidagi davlat – el-yurt uchun ulugʻ saodat“ deya nomlangan. Ushbu bobda sud-huquq tizimidagi islohotlar, korrupsiyaga qarshi kurashish boʻyicha ayrim masalalar tilga olingan. 2023-yilda yangilangan Oʻzbekiston Konstitutsiyasida Oʻzbekistonning boshqa davlatlarning ichki ishlariga aralashmaslik, suveren tengligini, kuch ishlatmaslik, kuch bilan tahdid qilmaslik, nizolarni tinch yoʻl bilan hal etish prinsiplarini amalda oʻz ifodasini topayotganini mamnuniyat bilan qayd etilgan.

6-bob:Yangi Oʻzbekiston – xavfsiz va tinchliksevar davlat

6-bob „Yangi Oʻzbekiston – xavfsiz va tinchliksevar davlat“ deb nomlangan. Mazkur bobda Oʻzbekistonning diplomatiyasi, xorijda mehnat qilayotgan migrantlarni huquqlarni himoya qilish, ularni qoʻllab-quvvatlash, qurolli kuchlar tizimini rivojlantirish va Afgʻonistonda tinchlik oʻrnatish boʻyicha mulohazalar bildirib oʻtilgan.