Abdumo‘min Ro‘ziyev

Abdumo'min ro'ziyev
Tavalludi	Surxondaryo viloyati Sho'rchi tumani →
Taʼlimi	Oʻrta Osiyo Davlat universiteti
Kasbi	Iqtisodchi-geograf
Unvoni	Fan doktori, professor

Abdumoʻmin Roʻziyev — Geografiya fanlari doktori, professor, Termiz davlat universiteti geografiya kafedrasi asoschisi.

Biografiyasi

Abdumoʻmin Normurodovich Roʻziyev 1936-yil 18-iyunda Surxondaryo viloyati, Shoʻrchi tumani, Sayrak qishlogʻida tavallud topgan. Oʻrta maktabni muvaffaqiyat bilan tamomlagach Oʻrta Osiyo Davlat universitetining (Oʻzbekiston Milliy Universiteti) geografiya fakultetiga oʻqishga kirgan. 1960-yilda universitetni iqtisodchi-geograf mutaxassisligi bilan yakunlagan.

Ish faoliyati

Roʻziyev 1960-yildan 1963-yilga qadar SSSR Fanlar akademiyasi tasarrufidagi geografiya ilmiy tadqiqot boʻlimida laborant va kichik ilmiy xodim lavozimlarida faoliyat yuritgan. Ilmiy tadqiqot boʻlimida ishlash davomida yetuk olimlar A. N. Rakitnikov, K. I. Ivanov, Z. M. Akromovlardan maslahatlar olgan. Buning natijasida Roʻziyevda yangi soha hioblangan qishloq xoʻjalik geografiyasiga qiziqish uygʻongan. 1959-yilda Roʻziyev olimlar tomonidan uyushtirilgan „Surxondaryoning ishlab chiqarish kuchlarini oʻrganish“ nomli ilmiy ekspiditsiyada ishtirok etgan. Shu ekspiditsiyadan soʻng Roʻziyev Surxondaryo tabiati, yer osti boyliklari, ishlab chiqarishiga oid qator ilmiy tadqiqotlar olib borgan. Roʻziyev „Surxon-Sherobod vodiysida qishloq xoʻjaligining joylashishi va rivojlanishi“ nomli nomzodlik dissertatsiyasini himoya qilgan. Keyinchalik bu nomzodlik dissertatsiyasi kitobcha holida chop etilgan.

Qarshi Davlat pedagogika instituti

Roʻziyev 1963-yilda Qarshi Davlat pedogogika institutiga talabalarga dars berish uchun chaqirilgan. 1963-yildan 1978-yilgacha institutda katta oʻqituvchi, dotsent, kafedra mudiri lavozimlarida faoliyat yuritgan.

Termiz Davlat pedagogika instituti

Roʻziyev 1978-yilda Termiz Davlat pedagogika instituti ish faoliyatini boshlagan. Institutda 1980-yildan 1983-yilgacha ilmiy ishlar boʻyicha prorektor, kafedra mudiri lavozimlarida ishlagan. 1987-ylda „Oʻzbekiston SSR agrosanoat kompleksida teritorial sistemalar va ularni takomillashtirish yoʻllari“ mavzusida doktorlik dissertatsiyasini himoya qilgan.

Ilmiy faoliyati

Roʻziyevning Oʻzbek sovet va Katta sovet ensiklopediyalarida 59 ta maqolasi chop etilgan. Olim 12 ta monografiya va risolalar, 121 ta ilmiy va 120 ta ilmiy-ommabop maqolalar muallifi xisoblanadi.