Navtaka, Navtoqa – qadimiy Sugʻd viloyati. Nomi ehtimol sugʻdchada „yangi toq“, „yangi inshoot“ yoki „yaqinda qurilgan“ni bildiradi. Navtaka Aleksandr (Iskandar)ning Oʻrta Osiyoga qilgan yurishi (miloddan avvalgi 329—327-yillar) davri haqidagi yozma manbalarda uchraydi. Navtakadagi qalʼalardan birida Doro III ning qotili Bess asir olingan. Miloddan avvalgi 328-yilda Aleksandrning qoʻshini Navtakada qishni oʻtkazgan. Ayrim olimlarning fikricha, Navtaka Qarshidan 10km shimoli-gʻarbdagi Yerqoʻrgʻon shahri harobasi oʻrnida boʻlgan. Biroq Navtakaning hozirgi Qashqadaryo viloyatining sharqiy qismida joylashgan deyishga koʻproq asoslar bor[1].
