Malus qonuni

Malus qonuni — yorugʻlik qutblovchi asbob (polyarizator) dan oʻtganda chiziqli yorugʻlik intensivligining oʻzgarishi qonuni. Tushayotgan yorugʻlikning qutb tekisligi va qutblovchi asbobning qutblash tekisligi orasidagi burchak $\varphi$ ga nisbatan yorugʻlik intensivligi har xil oʻzgaradi. Malus qonuni 1810-yilda fransuz fizigi Étienne-Louis Malus (1775—1812) kashf qilgan. Qutb tekisliklari (yorugʻlik va asbob) orasidagi burchak $\varphi$, analizatorga tushayotgan chiziqli yorugʻlik intensivligi $E_{0}$ boʻlsa, analizatordan chiqayotgan yorugʻlik intensivligi Malus qonuniga asosan $E=E_{0}\cos ^{2}\varphi \;$ boʻladi. Yorugʻlik intensivligini oʻlchaydigan asbob va qurilmalar Malus qonuni asosida ishlanadi.