Kriostat

Kriostat (krio... va yun. statos — turgʻun, harakatsiz) — ichida oʻzgarmas kriogen temperatura (120° K dan past) toʻtib turiladigan metall, shisha yoki plastmassadan yasalgan qurilma; kriogen texnikasi vositasi. Odatda, suyultirilgan yoki qotirilgan gazlar (azot, vodorod, geliy va boshqalar) bilan sovitiladi. K.dagi maxsus idishga solingan sovituvchi gaz bosimini oʻzgartirish bilan K. ga joylashtirilgan muhit temperaturasini oʻzgartirmay turish mumkin. K. tashqi muhit taʼsiridan yaxshi izolyasiya qilinadi (Dyuar idishi, termos singari). Suyultirilgan gaz solingan (mas, geliy — sovituvchi agent, azot — atrof muhitdan issiqlik kirishiga qarshilik koʻrsatadi) metall K. keng tarqalgan. Bunday K.larning korpusi bilan ichki qismlari orasidagi temperatura oʻzgarishlarini silfon baravarlashtirib turadi. Radiotexnika, optika, texnika va boshqalarda ishlatiladi.