Jizzax politexnika instituti

Jizzax politexnika instituti

Jizzax politexnika instituti
Jizzax politexnika instituti binosi
Xalqaro nomi	Jizzakh Polytechnic Institute
Boshqa nomi	JizPI
Ilgarigi nomi	Toshkent arxitektura va qurilish instituti Jizzax filiali, Toshkent kimyo-texnologiya instituti Jizzax filiali, Toshkent avtomobil yo‘llari instituti Jizzax filiali
Shiori	Ilm — taraqqiyot kaliti
Turi	Davlat oliy taʼlim muassasasi
Asos solingan sanasi	1992-yil 28-fevral (1992-02-28)
Akkreditatsiya	Oʻzbekiston Respublikasi Oliy va oʻrta maxsus taʼlim vazirligi
Rektori	Usmankulov Alisher Kadirkulovich
Fakultetlar	7
Xodimlar tarkibi	600 dan ortiq professor-oʻqituvchilar
Talabalari	9500 dan ortiq
Bakalavriat	33 ta yoʻnalish
Magistratura	16 ta mutaxassislik
Doktorantura	4 ta ixtisoslik
Manzili	Islom Karimov shoh koʻchasi, 4-uy , Jizzax , Jizzax viloyati , 130100 , Oʻzbekiston 40.1204°N 67.8282°E / 40.1204; 67.8282
Kampusi	22 300 m² maydon, 3 ta o‘quv binosi, 400 o‘rinli yotoqxona, IT Park va texnopark
Tili	oʻzbek tili
Ranglari	Moviy va oq
Veb-sayti	jizpi.uz
Jizzax politexnika instituti logotipi
Oʻzbekistondagi joylashuvi

Jizzax politexnika instituti (JizPI) — Oʻzbekiston Respublikasi Oliy va oʻrta maxsus taʼlim vazirligi tizimidagi davlat oliy taʼlim muassasasi. Institut 1992-yil 28-fevralda Oʻzbekiston Respublikasi Prezidenti farmoni hamda 1992-yil 11-martdagi Vazirlar Mahkamasining 125-sonli qaroriga asosan Toshkent arxitektura va qurilish instituti, Toshkent kimyo-texnologiya instituti hamda Toshkent avtomobil yo‘llari institutlari Jizzax filiallari negizida tashkil etilgan. Shu sababli JizPIning yoshi 1992-yildan emas, balki 1977-yildan hisoblanadi. Oliy ta’lim muassasasi Jizzax shahrida joylashgan boʻlib, texnika, qurilish, energetika, transport va iqtisodiyot yo‘nalishlarida mutaxassislar tayyorlaydi.

Tarix

Jizzax politexnika instituti oʻz faoliyatini 1977-yilda Toshkent politexnika institutining Jizzaxdagi “Umumtexnika fakulteti” sifatida boshlagan. Fakultetga dastlab dotsent N. Yu. Tashlanov rahbarlik qilgan. 1992-yilda institut maqomini olgach, uning negizida Toshkent arxitektura va qurilish instituti, Toshkent kimyo-texnologiya instituti hamda Toshkent avtomobil yo‘llari institutining Jizzax filiallari birlashtirilgan.

Mustaqil institut sifatida faoliyat boshlagan dastlabki davrda rektor lavozimini texnika fanlari nomzodi M. T. Turopov bajargan. 1992-yil oxirida akademik Nosir Rashidovich Rashidov rektor etib tayinlangan. U rahbarlik qilgan yillarda o‘quv-ilmiy faoliyat, moddiy-texnik baza kengaytirildi, yangi fakultet va kafedralar tashkil etildi.

2003-yildan 2012-yilgacha institutni professor Ibrohim Sodiqov boshqargan. Uning davrida ilmiy-tadqiqot ishlari, innovatsion dasturlar va xalqaro hamkorlik rivojlantirildi. 2012-yildan 2016-yilgacha institutga fizika-matemetika fanlari nomzodi, dotsent Soliyev Ergash Alibekovich rektorlik qilgan. 2016-yildan buyon institutga texnika fanlari doktori, professor Alisher Kadirkulovich Usmankulov rahbarlik qilib kelmoqda.

Faoliyati

Institut mamlakat iqtisodiyoti uchun texnik, qurilish, elektroenergetika, transport va ishlab chiqarish sohalarida malakali mutaxassislar tayyorlaydi. JizPIda 7 ta fakultet, 27 ta kafedra, 33 ta bakalavriat yo‘nalishi va 16 ta magistratura mutaxassisligi mavjud. Shuningdek, 4 ta doktorantura ixtisosligi faoliyat yuritadi. O‘quv jarayonida ilg‘or pedagogik texnologiyalar va elektron ta’lim tizimlari qo‘llaniladi.

Kampus

Jizzax politexnika institutining umumiy maydoni 22 ming kvadrat metrdan ortiq bo‘lib, unda:

• 1500 oʻrinli asosiy bino;
• 1000 oʻrinli o‘quv-laboratoriya binosi;
• 600 oʻrinli ma’ruza zali;
• 400 oʻrinli talabalar turar joyi;
• sport zali, IT-Park, texnopark, oshxona va dam olish maskanlari mavjud.

So‘nggi yillarda institut kampusi to‘liq rekonstruksiya qilinib, o‘quv xonalari zamonaviy texnik vositalar bilan jihozlandi. Institut kutubxonasi 60 mingdan ortiq adabiyotga ega bo‘lib, talabalarga ochiq axborot markazi sifatida xizmat qiladi.

Ilmiy faoliyat va xalqaro hamkorlik

Institut professor-o‘qituvchilari Germaniya, Angliya, Shvetsiya va boshqa davlatlarning oliy ta’lim muassasalari bilan hamkorlik aloqalarini yo‘lga qo‘ygan. Xususan:

• Germaniyaning Gamburg texnika universiteti bilan “Iqlim o‘zgarishiga moslashuv” loyihasi;
• Angliyaning Birmingem universiteti bilan “Avtomobil yo‘llari muhandisligi” dasturi;
• Shvetsiya Qirollik texnologiya universiteti bilan texnik ta’limni modernizatsiya qilish loyihasi amalga oshirilgan.

Bundan tashqari, JizPI xalqaro “TEMPUS”, “HIGHVEC” va “Erasmus+” dasturlarida ishtirok etib, ta’lim tizimini yangilash bo‘yicha grantlar asosida loyihalarni bajarib kelmoqda.

Fakultetlar

№	Fakultet nomi	Yo‘nalish sohasi
1	Arxitektura va qurilish fakulteti	Qurilish, arxitektura va dizayn
2	Sanoat texnologiyalari fakulteti	Ishlab chiqarish, texnologiyalar
3	Avtotransport fakulteti	Transport tizimlari va logistika
4	Elektromexanika va radioelektronika fakulteti	Elektronika, energetika
5	Servis fakulteti	Xizmat ko‘rsatish, turizm, menejment
6	Energetika va transport tizimlari fakulteti	Energiya tizimlari va muhandislik
7	Iqtisodiyot va boshqaruv fakulteti	Boshqaruv, moliya, iqtisodiyot

Rektorlari

Yillar	Rektor	Ilmiy daraja
1977–1983	N. Yu. Tashlanov	dotsent
1983–1986	F. H. Qurbonov	professor
1986–1988	S. I. Ikromov	fan nomzodi
1988–1990	U. Yu. Yuldashev	dotsent
1991	A. Yu. Salimov	dotsent
1992	M. T. Turopov	fan nomzodi
1992–2002	N. R. Rashidov	akademik
2002–2003	B. I. Matniyazov	dotsent
2003–2012	I. S. Sodiqov	professor
2012-2016	E.A.Soliyev	fan nomzodi, dotsent
2016–hozirgacha	A. K. Usmankulov	texnika fanlari doktori