Dakka

Vikipediya, ochiq ensiklopediya
Jump to navigation Jump to search
National Assembly of Bangladesh, Dhaka.

Dakka, Dhaka (hosildorlik maʼbudasi nomidan) — Bangladesh poytaxti. Gang-Brahmaputra daryosi deltasidagi port. Mamlakatning va Dakka viloyatining maʼmuriy siyosiy, iqtisodiy, madaniy va diniy markazi. Aholisi 3,8 mln. kishi (shahar atrofi bilan 7,4 mln., 1998).

Dakka Bengaliyaning eng koʻhna shaharlaridan, 1608—1717 yillarda uning poytaxti. 17—18-asr boshlarida xunarmandchilik va savdoning dunyodagi eng yirik markazlaridan boʻlgan. Dakkada ishlangan muslin (yupqa gazlama), kashta, oltin va kumushdan yasalgan buyumlar koʻp mamlakatlarda, jumladan Yevropada ham mashhur boʻlgan. Angliya istilosidan keyin (18-asr) Hindistonga Angliyadan koʻplab gazlamalar keltirila boshlagach, mahalliy hunarmandchilik va savdo inqirozga uchradi. 20-asr boshida D. milliy ozodlik harakatining markazlaridan biri boʻldi. 1906 yilda D.da musulmonlar ligasi tuzildi. Pokiston davlati tashkil topgandan soʻng D. 1947—1971 yillarda Sharqiy Pokiston (Sharqiy Bengaliya)ning maʼmuriy markazi, 1971 yil dekabrdan, Sharqiy Bengaliya ozodlikka erishgandan soʻng vujudga kelgan Bangladesh Xalq Respublikasining poytaxti.

Dakka— muhim transport yoʻllari tuguni. Xalqaro aeroport bor. Dakka va uning atrofi, Narayanganj shahri bilan birga, mamlakat sharqiy qismining asosiy sanoat rayonidir. Mamlakatdagi ip gazlama, jun, oziq-ovqat, kimyo, metallsozlik, oyna, koʻn sanoatlarining asosiy qismi Dakkada joylashgan. Dakkaning koʻhna qismida Lal Bagh qalʼasi, Sat Gumbaz masjidi, Katta bozor (17-asr), "Yulduzlar masjidi" (18-asr); Yangi shahar qismida universitet, Yangi masjid, Sanʼat instituti, Milliy kutubxona, xukumat idoralari va boshqalar bor.

Gallery[tahrir]

Adabiyot[tahrir]

  • OʻzME. Birinchi jild. Toshkent, 2000-yil