Abr (obraz)

Abr (forscha) — bulut. Alisher Navoiy ijodida abr bilan bog‘liq juda ko‘p iboralar uchraydi:

• Abri balo — balo buluti, ofatli bulut;
• Abri bahor — bahor buluti, ko‘klam buluti;
• Abri bahoriy — bahorgi bulut, ser­yog‘in bulut;
• Abri guharbor — gavhar yog‘diruvchi bulut; (majoziy) saxovatli, qo‘li ochiq kishi;
• Abri guharsanj - gavhar yog‘diruvchi bulut;
• Abri ehson — (majoziy) karam va saxovatda mardonalik, lutfu karam bilan to‘kin-sochin qiluvchi;
• Abri kofurbez — qor yog‘diruvchi bulut;
• Abri karam — saxovat, ikrom buluti;
• Abri mutir — seryog‘in bulut;
• Abri navbahor — erta bahordagi seryog‘in bulut;
• Abri nayson — aprel oyidagi seryog‘in bulut;
• Abri purbor — qalin, seryog‘in bulut;
• Abri hasrat — (majoziy) armon, qayg‘u va hasratni ko‘paytiruvchi hodisa.
• Abri rahmat — rahmat va baraka yomg‘irini keltiradigan bulut;
• Abri qiyrmonand — qora bulut

Abr irfoniy ramz shaklida banda va Iloh o‘rtasidagi hijob — parda. Bu shunday pardaki, istidlol va ijtihod orqali Mutlaq Haqiqatga yetishish imkonini beradi. Shuningdek, abr ilohiy fayz timsoli sifatida ham qo‘llanilgan.

Yuzung g‘amida erur abri navbahor ko‘z­um,

Ne ayb, yer yuzini qilsa lolazor ko‘zum.

(„G‘aroyib us-sig‘ar“, 434-g‘azal)