Kattahovuz mahallasi

KATTAHOVUZ – Ko‘kcha dahasidagi qadimiy mahalla. «Obinazir», «Darvoza», «Ayrilish», «Sarxumdon» mahallalari bilan chegaradosh bo‘lgan. Mahallada katta hovuz bo‘lgan (nomi shundan). Qariyb 350 xonadon yashagan. Aholisi, asosan, o‘zbeklar bo‘lib, ko‘nchilik, shahar tashqarisidagi yerlarida (Qo‘riqrabod, Cho‘ponota, Oqtepa, Damachi mavzelarida) dehqonchilik bilan shug‘ullangan. Masjid, choyxona, sartaroshxona, baqqollik do‘konlari bo‘lgan (20-asr boshi). Kattahovuzning hozirgi hududida Gulobod dahasi qurilgan.

«Kattahovuz» mahallasi (Asadulla Xo‘jayev ko‘chasi, 2) – Shayxontohur tumanidagi mahalla. 1-shahar klinik kasalxonasi yonida joylashgan. Hozirgi «Obinazir», «Gulobod», «Sarxumdon», «Yangi shahar», «Oqilon» mahallalari bilan chegaradosh. 1961 yilda tashkil etilgan. 1995 yildan hozirgi nomi bilan ataladi. Aholisi 3802 kishi, asosan, o‘zbeklar (2009). Mahalla hududida oziq-ovqat do‘koni, modalar atelesi, bir qancha dorixona, novvoyxona mavjud. Mahalla 1998 yil tubdan o‘zgartirilgan. Mahallada shoir Tavallo va bir qancha taniqli san’atkorlar: Lutfixonim Sarimsoqova, Karim Zokirov istiqomat qilgan.

Manbalar

«Toshkent» ensiklopediyasi. 2009 yil