Dilora Sharipova
| Dilora Sharipova | |
|---|---|
 | |
| Tavalludi |
9-iyul 1938-yil Toshkent, Oʻzbekiston SSR |
| Fuqaroligi |
 Oʻzbekiston |
| Ish joylari | Nizomiy nomidagi Toshkent davlat pedagogika universiteti |
| Taʼlimi | Toshkent tibbiyot instituti Oʻzbekiston jismoniy tarbiya instituti |
| Ilmiy darajasi | pedagogika fanlari doktori biologiya fanlari nomzodi |
| Ilmiy unvoni | professor |
| Mukofotlari |
 |
Dilora Jumaniyazovna Sharipova (1938-yil 9-iyul, Toshkent, Oʻzbekiston SSR) — oʻzbekistonlik olima, pedagogika fanlari doktori, biologiya fanlari nomzodi, professor.
Biografiyasi[tahrir | manbasini tahrirlash]
Dilora Sharipova 1938-yilning 9-iyulida Toshkent shahrida ziyoli oilasida tugʻilgan[1]. 1955-yilda Toshkent tibbiyot institutining pediatriya fakultetiga oʻqishga kiradi. 1961-yilda institutni bitirib, 1962-yilgacha Chirchiq tugʻruqxonasida mikropediatr boʻlib ishlagan. 1962—1963-yillarda „Sanitariya, gigiyena va kasb kasalliklari“ ilmiy tekshirish institutida ilmiy xodim boʻlib faoliyat koʻrsatgan. 1963-yilda Toshkent davlat pedagogika institutining „Anatomiya, fiziologiya va gigiena“ kafedrasining aspiranturasiga kirib, 1966-yilda „Turli haroratda ovqat hazm qilish aʼzolarini boshqarishda tuz va suv almashinuvining ahamiyati“ mavzusida dissertatsiyasini yoqlab, biologiya fanlari nomzodi ilmiy darajasini oaldi. 1966—1990-yillarda Oʻzbekiston pedagogika fanlari ilmiy tadqiqot institutida laboratoriya mudiri, boʻlim mudiri, direktorning ilmiy ishlari boʻyicha oʻrinbosari lavozimida faoliyat yuritdi. 1967—1973-yillarda Oʻzbekiston jismoniy tarbiya institutining pedagogika fakultetida sirtdan oʻqiydi. 1990-yilda Nizomiy nomidagi Toshkent davlat pedagogika institutining „Yosh fiziologiyasi va maktab gigiyenasi“ kafedrasining dotsenti, keyin shu kafedraning mudiri lavozimida faoliyat yuritdi. 1990-yilda „Oʻquvchilar gigiyenik tarbiyasining ilmiy-pedagogik asoslari“ mavzusida dissertatsiya himoya qilib, pedagogika fanlari doktori ilmiy darajasini olgan. 1993-yilda professor ilmiy unvoni beriladi. 1997-yildan Nizomiy nomidagi Toshkent davlat pedagogika universitetining „Tibbiy bilim asoslari“ kafedrasi mudiri, 1998-yildan hozirgi vaqtgacha Nizomiy nomidagi Toshkent davlat pedagogika universiteti „Zoologiya va anatomiya“ kafedrasining professori lavozimida ishlab kelmoqda[1].
Ilmiy faoliyati[tahrir | manbasini tahrirlash]
500 dan ortiq ilmiy maqolalar, 20 dan ziyod monografiya, 100 dan ziyod uslubiy qoʻllanmalari muallifidir[1]. Ilmiy izlanishlari natijasiga koʻra Ushinskiy nomli mukofotga sazovor boʻlgan. Oʻzbekiston Respublikasi Xalq taʼlim aʼlochisi, I darajali „Sogʻlom avlod uchun“ ordeni sohibasi (1998)[2]. „Xalqaro pedagogik taʼlim fanlar akademiyasi“ning muxbir aʼzosi (1999), 2000-yildan shu akademiyaning akademigidir. 2019-yildan Turon akademiyasi, 2022-yildan „Antik dunyo“ akademiyasi akademigi[1].