Soʻroq

Vikipediya, ochiq ensiklopediya
(So'roqdan yoʻnaltirildi)
Jump to navigation Jump to search

Soʻroq (huquqda) — shaxsdan koʻrsatuv va tushuntiruv olish vositasi. S.ni surishtiruvchi, tergovchi, prokuror; sud ishlarini yuritish chogʻida esa — sud olib boradi. Tergov yoki sud ishi olib borilayotgan tilni tushunmaydigan shaxs tarjimon ishtirokida S. qilinadi. 16 yoshgacha boʻlgan guvoh va jabrlanuvchini S. qilishda uning ota-onalaridan biri yoki boshqa qonuniy vakili va pedagog ishtirok etadi. Gumon qilinuvchi va ayblanuvchi S. qilinganda uning himoyachisi hozir boʻlishi shart. S. vaqtida qiynoqqa solish, zoʻravonlik, shafqatsizlik yoki inson shaʼni va qadrqimmatini kamsituvchi boshqa tarzdagi tazyiqqa duchor etish jinoyat hisoblanadi. S. qilinuvchiga uning huquq va majburiyatlari tushuntirilishi shart. Voyaga yetgan guvoh va jabrlanuvchi S.da ataylab yolgʻon koʻrsatuv bersa yoki koʻrsatuv berishdan bosh tortsa, jinoiy javobgarlikka tortilishi haqida ogohlantiriladi. Qonun sud maslahatxonasida muhokama qilingan holatlar toʻgʻrisida — sudya va xalq maslahatchisini, jinoyat ishi boʻyicha — himoyachi va baʼzi shaxslarni S. qilishni taqiqlaydi. Gumon qilinuvchining va ayblanuvchining yaqin qarindoshlari guvoh yoki jabrlanuvchi tariqasida faqat oʻzlarining roziliklari bilan S qilinishi mumkin. S. qilishning shartlari va tartiblari Oʻzbekiston Respublikasi JPK ning 96—124moddalarida batafsil belgilangan.