Shisha tolalar

Vikipediya, ochiq ensiklopediya
Jump to navigation Jump to search

Shisha tolalar — suyuqlantirilgan shishadan tayyorlanadigan tolalar, diametri 3—100 mkm, uz. 20 km va undan uzun (uzluksiz Shisha tolalar) yoki diametri 0,5—20 mkm, uz. 1—50 sm (shtapel Shisha tolalar) qilib ishlab chiqariladi. Uzluksiz Shisha tolalar tashqi koʻrinishidan tabiiy yoki sunʼiy ipak tolalariga, shtapel Shisha tolalar esa ip yoki jun ipga oʻxshaydi.

Uzluksiz Shisha tolalar suyuqlantirilgan shisha massasini filyerlardan (teshiklar soni 200—2000) mexanik qurilmalar yordamida choʻzib tola shakliga keltirilib, gʻaltaklarga oʻraladi. Shtapel Shisha tolalar bir bosqichli usulda — suyuqlantirilgan shisha massasi oqimini bugʻ, havo yoki issiq gaz bilan ajratib hosil qilinadi.

SH.t. xossasi, kimyoviy tarkibi, issiqqa chidamliligi, elektr tokini oʻtkazmasligi, issiklik oʻtkazuvchanligining pastligi, termik kengayish koeffitsiyentining kichikligi, kimyoviy chidamliligi va mexanik puxtaligi bilan belgilanadi. Shisha tolalar hozirgi zamon texnikasida shishaplastiklar uchun armirlovchi (mustahkamlovchi) material sifatida, filtrlashda va elektrotexnikada izolyatsiya materiali sifatida ishlatiladi.