Komiljon Otaniyozov
| Komiljon Otaniyozov | |
|---|---|
| Shaxsiy maʼlumotlari | |
| Tavalludi |
20-iyul 1917-yil Xorazm |
| Vafoti |
11-may 1975-yil (57 yoshda) Toshkent |
| Mukofotlari |
 |
Komiljon Otaniyozov (1917.20.7, Shovot tumani, Boʻyrachi qishlogʻi — 1975.5.11, Toshkent; oʻz qishlogʻiga dafn etilgan) — xonanda, sozanda (tor), aktyor va bastakor. Oʻzbekiston SSR (1949), Turkmaniston (1964), Qoraqalpogʻiston (1968) xalq artisti. Nihoyatda jozibali va kuchli ovoz sohibi boʻlib, har bir asar talqinida badiiy yetuklikka erishgan. Doston yoʻllarini Bola baxshi Abdullayevdan, Xorazm maqom ashula yoʻllarini Matpano Xudoyberganovdan oʻrgangan. Toshkentdagi Hamza nomidagi musiqa bilim yurtini tugatgan (1955), Toshkent konservatoriyasida taʼlim olgan (1955—1956). Xorazm teatrlarida xonanda va aktyor sifatida ishlab (1936—1952), Farhod ("Farhod va Shirin"), Tohir, Parfi hofiz ("Tohir va Zuhra"), Qodir ("Gulsara"), Davron Ota ("Davron Ota") kabi obrazlar yaratgan. Otaniyozov Xorazm viloyat teatrida ashula va raqs ansambli tuzib (1949), konsertlar uyushtirgan. 1957—1975-yillarda Oʻzbekiston davlat filarmoniyasida yakkaxon xonanda, 1957-yilda filarmoniya qoshida Xorazm ashula va raqs ansambli (hozirgi Lazgi, 1957—1959 va 1963—1968 yillarda badiiy rahbari), 1967 yilda Turkmaniston SSRning Toshhovuz viloyati teatrida xalq ansambli, 1973—1974 yillar Shovot tumanida Feruz ansamblini tashkil etdi.
Otaniyozov 1930-yillardan murakkab xalq ashulalarini, dostonlardan qoʻshiqlar ayta boshlagan. Xorazm suvora va maqomlari Komiljon Otaniyozov ijrochilik faoliyatining yuqori bosqichi boʻldi. Komiljon Otaniyozov Xorazm doston qoʻshiqlari (nomalari) asosida yangicha uslub yaratgan. Bastakor sifatida bu uslubda ijod qilgan "Salom, senga Xorazmdan", "Muborak", "Vatan", "Olqish", "Temir yoʻl", "Oʻzbekiston", "Xorazm" kabi qoʻshiklari oʻzining ommabopligi va xalqchilligi bilan ajralib turadi. O. A. Stepanov bilan hamkorlikda "Aziz va Sanam", "Oshiq Gʻarib", S. Hayitboyev bilan "Soʻnggi xon" kabi musiqali dramalar yaratdi. Osiyo mamlakatlarida gastrolda boʻlgan.[1]
Manbalar[tahrir | manbasini tahrirlash]
 | Ushbu maqolada Oʻzbekiston milliy ensiklopediyasi (2000-2005) maʼlumotlaridan foydalanilgan. |
 |
- 20-iyulda tugʻilganlar
- 1917-yilda tugʻilganlar
- Shaxsiyatlar
- Xorazmda tugʻilganlar
- 11-mayda vafot etganlar
- 1975-yilda vafot etganlar
- Alifbo boʻyicha shaxsiyatlar
- Toshkentda vafot etganlar
- Buyuk xizmatlari uchun ordeni sohiblari
- Hurmat Belgisi ordeni sohiblari
- Shaxsiyatlar haqidagi chala maqolalar
- Kishilar
- Oʻzbekiston xalq artistlari