Futbol boʻyicha 2027-yilgi U-20 jahon chempionati

2027 FIFA U-20 World Cup

2027 FIFA U-20 Dünya Çempionatı 2027-yilgi FIFA U-20 jahon chempionati
Umumiy maʼlumotlar
Mezbon davlat	Ozarbayjon, Oʻzbekiston
Jamoalar	24 (6 ta konfederatsiyadan)
Avvalgisi	2025
Keyingisi	2029

2027-yilgi FIFA U-20 Jahon chempionati – FIFAga aʼzo assotsiatsiyalarining 20 yoshgacha boʻlgan erkaklar milliy terma jamoalari oʻrtasida oʻtkaziladigan, yoshlar futboli boʻyicha xalqaro musobaqaning 25-turniri boʻladi. Bu turnir 1977-yilda FIFA Yoshlar Jahon chempionati nomi bilan boshlangan va har ikki yilda bir marta oʻtkazib kelinmoqda. Musobaqa ilk bor Ozarbayjon va Oʻzbekiston tomonidan hamkorlikda oʻtkaziladi. Ikkala mamlakat ham ikkinchi marta FIFA turniriga mezbonlik qilmoqda: Ozarbayjon 2012-yilgi FIFA U-17 ayollar Jahon chempionatini, Oʻzbekiston esa 2024-yilgi FIFA futzal Jahon chempionatini oʻtkazgan. Bu, shuningdek, FIFA tarixidagi birinchi hamkorlikda oʻtkaziladigan yoshlar turniri hamda 2023-yilgi FIFA ayollar Jahon chempionatidan keyin ikki xil konfederatsiyaga mansub mamlakatlar tomonidan birgalikda oʻtkaziladigan ikkinchi turnir boʻladi.

Mezbon tanlovi

2025-yil 2-oktyabr kuni Shveysariyaning Syurix shahrida boʻlib oʻtgan FIFA Kengashi yigʻilishidan soʻng Ozarbayjon va Oʻzbekiston 2027-yilgi 20 yoshgacha boʻlganlar oʻrtasidagi Jahon chempionati mezbonlari etib tayinlandi.

Malakali jamoalar

Final turniriga jami 24 ta jamoa yoʻllanma oladi. Mezbon sifatida avtomatik ravishda yoʻllanma olgan Ozarbayjon va Oʻzbekistondan tashqari, qolgan 22 ta jamoa oltita alohida qitʼa musobaqalaridan saralanadi. 2025-yil 2-oktyabrda FIFA Kengashi FIFA yoshlar turniri uchun ilk bor qitʼalararo pley-off seriyasini oʻz ichiga olgan oʻzgartirilgan yoʻllanmalar taqsimotini tasdiqladi. Mezbon davlat uchun yoʻllanma toʻgʻridan-toʻgʻri ularning konfederatsiyasiga ajratilgan kvotalardan olinadi.

• OFK (Osiyo): 5 ta yoʻllanma (shu jumladan Oʻzbekiston)
• CAF (Afrika): 4 ta yoʻllanma
• KONKAKAF (Shimoliy Amerika, Markaziy Amerika va Karib havzasi): 4 ta yoʻllanma
• CONMEBOL (Janubiy Amerika): 4 ta yoʻllanma
• OFC (Okeaniya): 1 ta yoʻllanma
• UEFA (Yevropa): 5 ta yoʻllanma (shu jumladan Ozarbayjon)
• Konfederatsiyalararo pley-off turniri: 1 ta yoʻllanma

Toʻrt jamoadan iborat pley-off turniri musobaqaning soʻnggi yoʻllanmasini belgilaydi. Pley-off yoʻllanmalari taqsimoti quyidagicha:

• OFK (Osiyo): 1 ta yoʻllanma
• KONMEBOL (Janubiy Amerika): 1 ta yoʻllanma
• OFC (Okeaniya): 1 ta yoʻllanma
• UEFA (Yevropa): 1 ta yoʻllanma

Musobaqa markazlashgan joyda oʻtkaziladi va ikkita yagona oʻyinli yarim final hamda final bosqichidan iborat boʻladi. Final gʻolibi Jahon chempionatiga yoʻllanma oladi.

Manzillar

Har bir mamlakat 26 ta oʻyinga mezbonlik qilishi kutilmoqda. Bular orasida guruh bosqichining 18 ta oʻyini, 1/8 finalning 4 ta uchrashuvi, 2 ta chorak final va bitta yarim final mavjud. Boku shahrida final bahsi, Toshkentda esa ochilish marosimi hamda uchinchi oʻrin uchun oʻyin oʻtkaziladi.