Flora Brovina

Flora Brovina
Tavalludi	1949-yil 30-sentyabr Skenderaj
Ijod qilgan tillari	Alban
Fuqaroligi	Kosovo
Imzosi

Flora Brovina (1949-yil 30-sentyabrda tugʻilgan) – kosovalik alban shoira, pediatr va ayollar huquqlari faoli. Kosovoning Drenica vodiysidagi Skenderaj shahrida tugʻilgan, ammo Prishtina shahrida ulgʻaygan, shu yerda maktabga qatnagan va tibbiyot boʻyicha taʼlim ola boshlagan. Oliy taʼlimda pediatriya sohasida Zagrebda tahsil olgan. Keyinroq Kosovoga qaytib, qisqa muddat davomida „Rilindja“ nomli alban tilidagi kundalik gazetada jurnalist sifatida faoliyat yuritgan. Oradan biroz vaqt oʻtib, yana sogʻliqni saqlash sohasiga qaytgan va koʻp yillar davomida Prishtina umumiy kasalxonasining pediatriya boʻlimida xizmat qilgan.

Kosovo urushi

1990-yillarda Kosovodagi siyosiy vaziyat yomonlashib, qurolli toʻqnashuvlar boshlangach, Flora Brovina Prishtinada sogʻliqni saqlash markazini boshqargan. Bu markaz orqali u aholiga sogʻliqni saqlash boʻyicha turli mavzularda, masalan, ilon chaqishi, yaralarni bogʻlash, tugʻruq jarayoni kabi holatlarda kerakli tibbiy maʼlumotlar bergan. Shuningdek, Brovina ushbu markazdan urush va majburiy koʻchirishlar natijasida yetim qolgan bolalar uchun boshpana sifatida ham foydalangan. U va uning hamkasblari bir vaqtning oʻzida 25 nafar bolaga gʻamxoʻrlik qilishgan.

1999-yil 20-aprel kuni Kosovo urushi davrida Flora Brovina oʻzi yashab turgan uyidan sakkiz nafar niqobli serb qurolli jangchilari tomonidan oʻgʻirlab ketilgan va mashinada nomaʼlum manzilga olib borilgan. Shundan soʻng u Serbiya hududida asirlikda boʻlgan. Oradan koʻp oʻtmay, NATO kuchlari Prishtinaga kirib kelib, serb qoʻshinlari Kosovodan chekindi. Brovina oʻgʻirlab ketilgani haqidagi birinchi xabar 1999-yil 24-aprelda tarqalgan boʻlib, bu haqida uning oʻgʻli xalqaro yozuvchilar uyushmasi PENga murojaat qilib, uning yoʻqolganini butun dunyoga yetkazishni soʻragan. Brovina Serbiyadagi Požarevac qamoqxonasiga koʻchirilgan. Asirlikning birinchi oyida u 18 ta alohida soʻroq sessiyasida 200 soatdan ortiq soʻroqqa tutilgan, har bir soʻroq, odatda, ertalab soat 7:00 dan kechki 17:00 gacha davom etgan. 1999-yil 9-dekabrda esa u Yugoslaviya Jinoyat Kodeksining 136-moddasi asosida „terrorchilik faoliyati“da ayblanib, jamoatchilik oldida sudlangan. Brovina bir yarim yil serb qamoqxonalarida saqlangan, soʻngra xalqaro darajadagi bosim natijasida ozodlikka chiqarilgan.

Siyosat

Kosovo mustaqil deb eʼlon qilingandan soʻng Flora Brovina 2001-yilda Kosovo Prezidenti lavozimi uchun nomzodini qoʻygan. U bu saylovda Kosovo Demokratik partiyasi (PDK) safidan, partiya yetakchisi Hashim Thaqi oʻrniga kutilmagan nomzod sifatida qatnashgan. Shundan keyin, Flora Brovina har bir parlament chaqirigʻida Kosovo Assambleyasi aʼzosi boʻlib faoliyat yuritgan.