Харков

Харков — Украинанинг Харков вилоятидаги шаҳар, вилоятнинг маъмурий ва иқтисодий маркази. Йирик транспорт йўллари чорраҳаси. Аҳолиси 1470,9 минг киши (2001).

Шаҳар 1655—56 йилларда қалъа сифатида бунёд этилди. 1919—34 йилларда УССРнинг пойтахти бўлиб турди. Х. машинасозлик бўйича Украинада етакчи ўринда (республикада ишлаб чиқариладиган маҳсулотнинг 1/5 қисмини беради). Х.да энергетика машинасозлиги, шу жумладан, электротехника саноати ("Турбоатом", "Электротяжмаш", "Укрелектромаш" ва бошқа и.ч. бирлашмалари; электромеханика, "Южкабел" ва бошқа заводлар), трактор машинасозлиги ("Харковский тракторний завод" ва бошқалар), қишлоқ хўжалиги ва транспорт машинасозлиги (мотор йиғиш, "Серп ва молот" и.ч. бирлашмалари; авиация саноати ва бошқалар), станок ва приборсозлик; радиоэлектроника саноати ва бошқа; кимё ва кимёфармацевтика, озиқ-овқат, енгил (тўқимачилик, поябзал, кўнтери, мўйначилик ва бошқалар) саноатлари ривожланган. Метрополитен (1975 йилдан), 21 олий ўқув юрти (шу жумладан, 3 университет), 6 театр (шу жумладан, опера ва балет театри), тарихий, бадиий, табиат музейлари бор. Меъморий ёдгорликлардан Покровский (17-аср), Успение (18-аср) соборлари; Екатерина саройи (18-аср), провиант омборлари (18-аср) сакланган.